1. Bosh sahifa

FARG’ONADA “ADABIYOT KUNLARI” O’TKAZILADI

×

Farg’ona viloyati hokimi Xayrullo Bozorovning joriy yilning 23 oktyabr kuni qabul qilgan farmoyishiga asosan noyabr oyining uchinchi o’n kunligida viloyatimizda “Adabiyot kunlari” o’tkaziladi.

Adabiyotshunos olim Umarali Normatov tavalludiga 90 yil, O’zbekiston Qahramoni, xalq shoiri Erkin Vohidov tavalludiga 85 yil, O’zbekiston Yozuvchilar uyushmasi a'zosi, taniqli shoir, dramaturg Saydali Odilov tavalludiga 80 yil to’lganligi, O’zbekiston xalq shoiri Anvar Obidjonning xotirasiga ehtirom ko’rsatish hamda rishtonlik iste'dodli yozuvchi Isajon Sulton “O’zbekiston xalq yozuvchisi” unvoni bilan taqdirlangani munosabati bilan ularning ijodiy merosini o’rganish, yosh avlodni Vatanga muhabbat va sadoqat, milliy va umuminsoniy qadriyatlar ruhida tarbiyalash borasidagi ahamiyatini inobatga olib, taniqli shoir va adiblarning tavallud kunlari hamda xotira kechasini “Adabiyot kunlari” tarzida viloyatimiz miqyosida keng nishonlash va xotirasini abadiylashtirishga qaror qilindi.

“Adabiyot kunlari” doirasida Qo’qon davlat musiqali drama teatrida Umarali Normatovning va Marg’ilondagi Erkin Vohidov nomidagi ijod maktabida Erkin Vohidovning hayoti va ijodiga bag’ishlangan ilmiy-ijodiy konferentsiyalar, Oltiariq madaniyat markazida Anvar Obidjonning xotira kechasi, Rishton tumani “Xalqaro kulolchilik markazi”da Isajon Sultonning va Farg’ona shahrida Saydali Odilovning hayoti va ijodiga bag’ishlangan adabiy uchrashuvlar o’tkazilishi belgilandi.

Ushbu ijodkorlarning ijodiy-madaniy merosini chuqur o’rganish, ilmiy-amaliy anjumanlar o’tkazish, ma'naviy merosimiz durdonalarini yoshlar qalbiga singdirish yuzasidan vazifalar belgilab berildi.

Bizni ijtimoiy tarmoqlarda kuzating
Facebook, Telegram, Facebook, YouTube