1. Bosh sahifa

FARG’ONADA SHVEYTSARIYA SARMOYASI BILAN BLOKCHEYN MUHANDISLIGI HAMDA KOMPYUTER O’YINLARI YARATISH SOHALARIGA IXTISOSLASHGAN XALQARO UNIVERSITET TASHKIL ETISH BO’YICHA MEMORANDUM IMZOLANDI

×

Viloyat hokimi Xayrullo Bozorov, axborot texnologiyalari sohasida dunyoning taniqli mutaxassislaridan biri, turkiyalik professor, International Swiss Science University rektori Tunjay Sevindikni qabul qildi.

Uchrashuvda bugungi kunda dunyoda axborot texnologiyalari sohasida sifatli kadrlarga oshib borayotgan ehtiyoj hamda Farg’ona viloyatida bu borada mutaxassislar tayyorlashda amalga oshirilayotgan ishlarni yangi bosqichga ko’tarish masalalari muhokama qilindi.

Tunjay Sevindik, Farg’ona shahrida barpo etilayotgan 13 qavatli zamonaviy IT-Park loyihasi bilan tanishganini hamda bu markaz unda katta taassurot qoldirganini qayd etdi.

Farg’onada Shveytsariya sarmoyasi bilan Blokcheyn muhandisligi hamda kompyuter o’yinlari yaratish sohalariga ixtisoslashgan xalqaro universitet tashkil etish masalasi uchrashuv kun tartibining asosiy mavzusi bo’ldi. Tunjay Sevindik, innovatsion rivojlanish va raqamli iqtisodiyot davrida blokcheyn va kriptovalyutalar bilan amalga oshiriladigan turli xildagi moliyaviy operatsiyalar yaqin yillarda O’zbekistonda ham banklar faoliyatining ajralmas bo’lagi holiga kelishini, har bir moliyaviy muassasada blokcheyn mutaxassislariga ehtiyoj paydo bo’lishini qayd etdi. Shuningdek, kompyuter o’yinlari yaratish sanoati bugun dunyoda 200 milliard dollarlik bozorga ega ekaniga e'tibor qaratgan Sevindik, bu sohada masofadan ishlash imkoniyatini hisobga olganda, mamlakatimiz yoshlari ham kerakli bilimlarni qo’lga kiritishsa, shu yerdan turib xalqaro kompaniyalarda yaxshi maoshlar bilan faoliyat olib borishlari mumkin bo’lishini ta'kidladi. Bulardan kelib chiqib, shuningdek Farg’onadagi yoshlarning bilim salohiyatini hisobga olib, viloyatimizda ushbu universitetni tashkil etish rejalashtirilgani ma'lum qilindi.

Viloyat hokimi ushbu loyihani har tomonlama qo’llab-quvvatlashga tayyor ekanliklarini bildirib, yangi oliygohni kelgusi o’quv yilidan boshlab ish boshlashi maqsadga muvofiq bo’lishini ta'kidladi.

Uchrashuv yakunida Blokcheyn muhandisligi hamda kompyuter o’yinlari yaratish sohalariga ixtisoslashgan xalqaro universitet tashkil etish bo’yicha memorandum imzolandi. Qisqa muddatda bu loyihani amalga oshirish bo’yicha Yo’l xaritasi ham tasdiqlanadi.

Bizni ijtimoiy tarmoqlarda kuzating
Facebook, Telegram, Facebook, YouTube