1. Bosh sahifa

“KITOBXONLIK HAFTALIGI” DOIRASIDA FARG’ONADA KITOB FESTIVALI BO’LIB O’TADI

×

Joriy yilning 18-23 aprel kunlari mamlakatimiz miqyosida o’tkaziladigan “Kitobxonlik haftaligi” doirasida I Farg’ona kitob festivali ham tashkil etiladi.

Viloyat hokimligi yig’ilish bayoni bilan tasdiqlangan chora-tadbirlar rejasiga ko’ra, Festival davomida respublika va viloyat nashriyotlari, kitob do’konlari ishtirokida kitob yarmarkalari tashkil etish, mualliflik kitoblari taqdimoti va dastxat qo’yish marosimini o’tkazish uchun respublika, ayniqsa, vodiy viloyatlarining taniqli ijodkorlarini jalb etish, shuningdek, kitob va bosma nashrlar chop etish sohasidagi yangiliklar ko’rgazmasini tashkil etish ko’zda tutilgan.

Farg’onada bo’lib o’tadigan “Kitobxonlik haftaligi” doirasida viloyat miqyosida “Eng yaxshi kitobxon hudud”, “Eng yaxshi kitobxon mahalla”, “Eng yaxshi kitobxon ta'lim muassasasi”, “Eng namunali kitob do’koni” ko’rik-tanlovlari o’tkaziladi, viloyatdagi barcha oliy ta'lim muassasalari talabalari o’rtasida “Eng kitobxon talaba”, “Eng kitobxon guruh”, “Eng kitobxon fakultet” intellektual tanlov va o’yinlari tashkil etiladi.

Viloyatda Axborot-kutubxona markazlarini har tomonlama qo’llab-quvvatlash hamda hududlarda kitobxonlik madaniyatini rivojlantirish maqsadida tajriba sifatida viloyat hokimi Ahmad Farg’oniy nomidagi viloyat axborot-kutubxona markazining, shahar va tuman hokimlari hududiy axborot-kutubxona markazlarining Faxriy raislari etib belgilandi.

“Kitobxonlik haftaligi” kunlarida viloyatimizning taniqli san'atkor va xonandalari ishtirokida gala-kontsert tashkil etilib, kontsertdan tushadigan mablag’lar viloyat ko’zi ojizlar kutubxonasi kitob fondini boyitishga yo’naltiriladi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram