1. Bosh sahifa

VILOYAT HOKIMINING NAVBATDAGI FUQAROLAR QABULI BO’LIB O’TDI

×

Bugun Farg’ona shahridagi “Tadbirkorlar uyi”da viloyat hokimi Xayrullo Bozorov tomonidan navbatdagi fuqarolar qabuli o’tkazildi. Qabulda viloyat prokurori Baxtiyor Ismoilov ham qatnashdi.

Qabul davomida shahar va tumanlardan kelgan, avvaldan viloyat hokimi qabuliga yozilgan 60 nafarga yaqin fuqarolar murojaatlari viloyat hokimligi mas'ullari, viloyat boshqarma va tashkilotlari rahbarlari ishtirokida ko’rib chiqildi. Moddiy yordam, uy-joy, subsidiya, tadbirkorlikni rivojlantirish uchun kredit olish, hududlarni obodonlashtirish, bandlik, tibbiy xizmat kabi yo’nalishlarda ko’plab masalalar eshitilib, 40 dan ziyod murojaatlarga qabul chog’ida aniq yechimlar belgilandi.

Farg’ona shahrida istiqomat qiluvchi Saidali Husanov xorijdan tibbiyot jihozlarini olib kelish uchun kredit olishda yordam so’radi va masalani ijobiy hal qilish uchun mutasaddilarga topshiriq berildi.

Farg’ona tumani Shohimardonobod MFY ahli nomidan murojaat bilan kelgan Shokirjon Xojiboyev esa hududda mavjud chiqindixona muammosini hal etish va yoshlarga qulay shart-sharoitlar yaratilishi bo’yicha murojaat qildi va bu masala joyiga chiqib o’rganishdan so’ng aholi takliflari asosida hal etilishi belgilandi.

Qo’qon shahridan kelgan yana bir fuqaro Dildora O’rinboyeva avvalgi qabuldagi murojaatlari ijobiy yechim topganini aytib minnatdorchilik bildirdi. “O’zim 2-guruh nogironiman. “Ayollar daftari” ro’yxatida turaman. Bir nafar farzandim bor. 5 million so’m moddiy yordam, subsidiya asosida tikuv mashinasi berildi, davolanishim uchun ko’mak ko’rsatildi. Uy-joy oldim. Hammasi uchun Prezidentimizga rahmat”, - dedi Dildora O’rinboyeva.

Qabul jarayonida ayrim fuqarolarning murojaatlari mas'ul idoralarga qo’shimcha o’rganish uchun yo’naltirildi. Qonuniy jihatdan yechim topish imkoni bo’lmagan murojaatlar bo’yicha ham fuqarolarga tegishli tartibda tushuntirishlar berildi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram