1. Bosh sahifa

FARG’ONADA O’ZBEKISTON KASABA UYUSHMALARI KUNI KATTA TANTANA BILAN NISHONLANDI

×

Bugun Farg‘ona shahridagi "Afrosiyob" tantanalar majmuasida O‘zbekiston kasaba uyushmalari Federasiyasining viloyat Kengashi tomonidan 11 noyabr - O‘zbekiston kasaba uyushmalari kuni munosabati bilan bayram tadbiri tashkil etildi.

Tadbirda viloyat hokimi Xayrullo Bozorov, O‘zbekiston kasaba uyushmalari Federasiyasi raisi o‘rinbosari Qobiljon Qirg‘izaliyev, viloyat sektorlari rahbarlari, viloyatdagi yirik ish beruvchi korxonalar rahbarlari, boshqarma va tashkilotlar kasaba uyushmalari xodimlari, jamoatchilik vakillari ishtirok etdilar.

Viloyat hokimi Xayrullo Bozorov bugungi kunda mamlakatimizdagi eng yirik jamoat tashkilotlaridan biri sifatida faoliyat ko‘rsatib kelayotgan soha xodimlarini bayram bilan samimiy qutlab, kasaba uyushmalari faoliyatini rivojlantirishda Farg‘onada o‘ziga xos tajriba maktabi yaratilganini e’tirof etdi. Xususan, birgina “Ayollar daftari” bilan ishlash borasida viloyatda 75 ming nafardan ziyod xotin-qizlarga amaliy yordam ko‘rsatilgani alohida qayd etildi.

Bugungi kunda viloyatimizda kasaba uyushmalari tizimida 3,5 mingdan ortiq boshlang‘ich tashkilotlarda 462 mingdan ziyod faollar fidokorona mehnat qilyapti. Ular korxona va tashkilotlarda ishchi-xodimlarning kasbiy, mehnatga oid, ijtimoiy-iqtisodiy huquq va manfaatlarini himoya qilishda, munosib mehnat sharoitlarini yaratishda faol ishtirok etib kelyapti.

Bayram tadbirida sohaning qator fidoyilari viloyat hokimining faxriy yorliqlari bilan taqdirlandilar. O‘zbekiston kasaba uyushmalari Federasiyasi tomonidan e’lon qilingan «Eng yaxshi sektor rahbari», «Eng yaxshi mahalla fuqarolar yig‘ini raisi» va boshqa turli tanlovlarning g‘oliblariga diplom va pul mukofotlari taqdim etildi.

El ardog‘idagi taniqli san’atkorlar ishtirokidagi kuy-qo‘shiqlar esa barchaga quvonch ulashdi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram