1. Bosh sahifa

FARG’ONA VILOYATI QISHLOQ XO’JALIGI MAHSULOTLARINI SAUDIYA ARABISTONI BOZORIGA OLIB KIRISH IMKONIYATI YARATILMOQDA

×

Bugun viloyat hokimligi qabullar uyida viloyat hokimining mahalliy sanoatni rivojlantirish masalalari bo’yicha yordamchisi Akmal Po’latov Saudiya Arabistoni Podshohligi Atrof-muhit, suv va qishloq xo’jaligi vazirligining Qishloq xo’jaligi tadqiqotlari va qishloq xo’jaligini kengaytirish departamenti bosh direktori Bandar Muhammad al-Saqhan boshchiligidagi saudiyalik investorlardan iborat katta delegatsiya vakillari bilan uchrashdi.

Uchrashuvda Saudiya Arabistoni va Farg’ona viloyati o’rtasida qishloq xo’jaligi sohasida hamkorlikni yo’lga qo’yish va kelgusida amalga oshirilishi lozim bo’lgan ishlar bo’yicha fikr almashildi.

Dastlab Akmal Po’latov Farg’ona viloyatining qishloq xo’jaligi salohiyati hamda eksport imkoniyatlari yuzasidan batafsil ma'lumotlar berdi. Shuningdek, investorlar uchun viloyatda yaratib berilayotgan shart-sharoitlar, imkoniyatlar haqida ham tanishtirdi.

Bandar Muhammad al-Saqhan samimiy tashkil etilgan uchrashuv uchun minnatdorchilik bildirib, tashrif maqsadi viloyatdagi qishloq xo’jaligi sohasidagi loyihalar bilan yaqindan tanishish, tajriba almashish orqali mahsulotlarni ayirboshlashdan umidvor ekanligini ma'lum qildi.

Uchrashuv davomida saudiyalik ishbilarmonlar ham o’z yo’nalishlari bo’yicha takliflarini bildirib, hamkorlikda ishlashga tayyor ekanliklarini bildirdilar. Taklif qilingan yo’nalishlar bo’yicha joyiga chiqilgan holda o’rganish va hamkorlikda ish tashkil qilishga kelishib olindi.

Saudiyalik mehmonlar kun davomida viloyatdagi meva-sabzavot mahsulotlarini saralash va qadoqlash, quritish jarayonlari, gulchilik plantatsiyalari faoliyati bilan tanishadilar.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram