1. Bosh sahifa

FARG’ONADA YANA BIR ENERGIYA TEJAMKOR ISITISH QOZONLARI ISHLAB CHIQARISH KORXONASI ISH BOSHLADI

×

Viloyat hokimi Xayrullo Bozorov Farg’ona shahri Kimyogarlar MFY hududidagi “Sanoatchilar” Yoshlar sanoat va tadbirkorlik zonasida “Teplo Ideal” MChJ tomonidan barpo etilgan energiya tejamkor isitish qozonlari ishlab chiqarish korxonasining ishga tushirilishiga bag’ishlangan tantanali tadbirda ishtirok etdi.

Davlatimiz rahbarining mamlakatimizda ijtimoiy soha ob'ektlarining isitish tizimlarini modernizatsiya qilish borasidagi qarori hamda bu qaror doirasida isitish qozonlari ishlab chiqaruvchilar bojxona va soliq imtiyozlari orqali qo’llab-quvvatlanayotgani, ularga qulay shart-sharoitlarni yaratilgani natijasida ish boshlagan ushbu korxona yiliga 750 ta ko’mir yoqilg’isida ishlaydigan energiya tejamkor isitish qozonlari ishlab chiqarish quvvatiga ega.

Muhtaram Prezidentimizning qarorlari bilan viloyatimizda jami 6 mingdan ziyod, shu jumladan, joriy yilning o’zida 2455 ta davlat ijtimoiy soha ob'ektlarining isitish tizimlari davlat-xususiy sheriklik asosida modernizatsiya qilinayotganini, energiya tejovchi va xavfsizlik darajasi yuqori bo’lgan isitish qozonlari o’rnatilayotganini qayd etgan viloyat hokimi Xayrullo Bozorov, isitish qozonlari ishlab chiqarishni mahalliylashtirish darajasini oshirish uchun viloyatimizda barcha sharoitlar yaratib berilishini ta'kidladi.

Tadbirkor Adhamjon Ma'murov tashabbusi hamda o’z mablag’lari hisobiga amalga oshirilgan loyiha qiymati 12,5 milliard so’m bo’lib, korxona Xitoydan keltirilgan zamonaviy texnologiyalar bilan jihozlangan.

Korxonada ishlab chiqariladigan avtomatlashtirilgan isitish qozonlari aholi xonadonlari va ijtimoiy soha ob'ektlarini samarali isitish tizimlari bilan ta'minlash uchun xizmat qiladi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram