1. Bosh sahifa

FARG’ONADA QISHLOQ XO’JALIGI XODIMLARI KUNI MUNOSABATI BILAN TANTANALI BAYRAM TADBIRI TASHKIL ETILDI

×

Bugun Farg’ona shahridagi “Wine Garden” tantanalar majmuasida Qishloq xo’jaligi xodimlari kuni munosabati bilan viloyat bayram tadbiri tashkil etildi. Tadbirda viloyat hokimi Xayrullo Bozorov, viloyat sektorlari rahbarlari, Qishloq xo’jaligi vazirining o’rinbosari Bunyodbek Oxunov, viloyatimiz qishloq xo’jaligi sohasi ilg’or vakillari ishtirok etdilar.

Tadbirni ochib bergan viloyat hokimi Xayrullo Bozorov, soha xodimlarini bugungi kasb bayrami – Qishloq xo’jaligi xodimlari kuni bilan samimiy muborakbod etdi.

Tabiatning sinovlariga matonat bilan bardosh bera olgan dehqonlar xizmati bilan bu yil ham kutilgandan ko’ra yuqori natijaga erishilganini alohida e'tirof etgan viloyat hokimi, Davlatimiz rahbari boshchiliklarida boshqa sohalar qatorida qishloq xo’jaligi sohasida ham katta islohotlar amalga oshirilayotganini, natijada yildan yilga hosildorlik oshib borayotganini qayd etdi.

Bu yil 733 ming tonna g’alla yetishtirilib, viloyatimiz Respublikada g’alladan eng yuqori hosil olgan hudud deb e'tirof etilgani alohida ta'kidlandi.

Paxtachilikda 60 tsentnerdan yuqori hosil olib, barchaga namuna bo’lgan viloyatdagi fermer xo’jaliklari, shuningdek, yangi korxonalar barpo etish, ish o’rinlari yaratishda, viloyat ijtimoiy hayotida faol o’rin tutayotgan klasterlar alohida e'tirof etildi.

Joriy yilda viloyatimizda 733 ming tonna g’alla, 293 ming tonna paxta, 2,3 ming tonna pilla, 3211 ming tonna meva-sabzavot, 1320 ming tonna go’sht va sut mahsulotlari, 655 million dona tuxum hamda 23 ming tonna baliq yetishtirildi. Eksportyorlar, agroklasterlar va fermer xo’jaliklari tomonidan 242 million dollarlik qishloq xo’jaligi mahsulotlari eksport qilindi. Har bir yo’nalishda belgilangan rejani ortig’i bilan bajarishga erishildi, hosildorlik va samaradorlik o’tgan yilga nisbatan sezilarli oshdi. Ushbu natijalarni yuqori baholagan viloyat rahbari, kelgusi yilda barcha yo’nalishlarda yanada yuqori hosildorlik qayd etilishiga ishonch bildirdi.

Tadbirda qishloq xo’jaligi sohasida yuqori ko’rsatkichlarga erishgan bir guruh fermerlarga hamda sohaning ilg’or faxriylari va xodimlariga “Qishloq xo’jaligi fidoyisi”, “Ilg’or fermer” ko’krak nishonlari hamda viloyat hokimining faxriy yorliqlari, esdalik sovg’alari topshirildi.

Bayram tantanasi taniqli so’z ustaci Avaz Oxunning chiqishlari, elimiz ardog’idagi xonandalar Alisher Fayz, Malika Egamberdiyeva, Otabek Muhammadzohid, Yaxyobek Mo’minov, Abdujalil Qo’qonovlar tomonidan ijro etilgan diltortar taronalar bilan davom etdi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram