1. Bosh sahifa

“AQLLI” BINOLAR TEXNOLOGIYALARI, QULAYLIK VA XAVFSIZLIK TIZIMLARI ISHLAB CHIQARISHDA DUNYONING PESHQADAM KOMPANIYASI BO’LGAN JOHNSON CONTROLS ARABIA KOMPANIYASI FARG’ONADA YIRIK INVESTITSION LOYIHANI AMALGA OSHIRADI

×

Viloyat hokimi Xayrullo Bozorov boshchiligidagi Farg’ona delegatsiyasining Quvayt va Saudiya Arabistoniga hamkorlik aloqalarini kengaytirishni ko’zda tutgan amaliy tashrifi davomida Jidda shahrida Johnson Controls Arabia kompaniyasi asoschisi shayx Saleh bin Laden hamda boshqaruv kengashi raisi Muhammad al-Shayx boshchiligidagi kompaniya vakillari bilan uchrashuv bo’lib o’tdi.

Uchrashuvda Farg’ona viloyati hududida hamkorlikda investitsion ishlab chiqarish loyihalarini amalga oshirish istiqbollari muhokama qilindi.

Ikki davlat rahbarlarining siyosiy irodasi va olib borayotgan oqilona boshqaruvi natijasida so’nggi yillarda O’zbekiston bilan Saudiya Arabistoni o’rtasida ikki tomonlama manfaatli hamkorlik jadal rivojlanib borayotgani, o’zaro savdo hajmi muttasil o’sib borayotgani, Saudiya investitsiyalari yurtimizga jadal kirib borayotgani qayd etildi.

Dunyoda eng ko’p turda isitish, ventilyatsiya va konditsiyalash jihozlari, shuningdek, binolarni avtomatlashtirish tizimlari, xavfsizlik va kuzatuv texnologiyalari, yong’inga qarshi avtomatika tizimlari ishlab chiqaruvchi Johnson Controls Arabia (York) kompaniyasi uchun Farg’onada ham qulay bozor mavjudligi, viloyatimiz orqali chegaradosh davlatlar bozoriga ham kirib borish imkoniyati mavjudligiga e'tibor qaratildi.

Farg’ona viloyatining iqtisodiy-investitsion salohiyati, viloyatga to’g’ridan-to’g’ri xorijiy investitsiyalar holati, eksport ko’rsatkichlari, viloyatimizda mavjud sanoat zonalari, soliq imtiyozlari, logistika afzalliklari haqida Johnson Controls Arabia rahbariga ma'lumot berildi.

O’zbekistonga bo’layotgan islohotlarni shaxsan ko’rish uchun yurtimizda bo’lib qaytanini ma'lum qilgan Muhammad al-Shayx, mamlakatimizga tashrifidan so’ng yanada yangi g’oyalar bo’yicha hamkorlik qilish istagi tug’ilganini ta'kidladi.

Ko’plab davlatlarda ishlab chiqarish korxonalari borligini, kelgusidagi korxona Farg’onada barpo etilishini bildirgan Johnson Controls Arabia rahbari, Farg’onada boshqa yirik loyihalar bo’yicha ham hamkorlik qilishga tayyor ekanligini ma'lum qildi.

Uchrashuv yakunida viloyat hokimi Xayrullo Bozorov, Johnson Controls Arabia kompaniyasi boshqaruv kengashi raisi Muhammad al-Shayx hamda Quvaytning “Energy Solutions” kompaniyasi boshqaruv kengashi raisi Eyad al-Saleh o’rtasida Farg’ona viloyatida isitish, ventilyatsiya va konditsiyalash jihozlari ishlab chiqarish korxonasini tashkil etish bo’yicha o’zaro hamkorlikni ko’zda tutgan anglashuv Memorandumi imzolandi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram