1. Bosh sahifa

ROSSIYANING MICHURINSK ILM-FAN SHAHARCHASI BILAN QISHLOQ XO’JALIGIDA INNOVATSIYALAR SOHASIDA HAMKORLIK QILINADI

×

Viloyat hokimining o’rinbosari Nuriddin Mamajonov boshchiligidagi Farg’ona viloyati delegatsiyasi Rossiyaning Tambov viloyatida joylashgan Michurinsk ilm-fan shaharchasida (naukograd) bo’lib, qishloq xo’jaligi sohasida ta'lim, ilm-fan va ishlab chiqarishning uzviy integratsiyasini ta'minlash hamda bu jarayonga innovatsiyalarni joriy qilish bo’yicha hamkorlik aloqalarini o’rnatish yuzasidan uchrashuvlar o’tkazdi.

Viloyatimiz vakillari Michurinsk davlat qishloq xo’jaligi universitetida bo’lib, Michurinsk ilm-fan shaharchasining iqtisodiy va ilmiy-innovatsion salohiyati bilan tanishdilar, oliygoh qoshidagi ilmiy-tadqiqot markazlari faoliyatini ko’zdan kechirdilar.

Michurinsk davlat qishloq xo’jaligi universiteti rektori Sergey Jidkov va Michurinsk shahar merining o’rinbosari Dmitriy Neuymin viloyatimiz delegatsiyasi a'zolariga o’rganish jarayonida hamrohlik qildilar.

Dastlab universitet professor-o’qituvchilari va talabalari tomonidan tashkil etilgan Peyzaj parki ko’zdan kechirildi, qishloq xo’jaligi ekinlarining selektsiyasi, mahalliy sharoitlarga adaptatsiyasi amalga oshirilayotgan ilmiy-tadqiqot ishlari natijalari bilan tanishildi. Shuningdek, delegatsiyamiz vakillari qishloq xo’jaligi mahsulotlarini yetishtirish texnologiyalari, saqlash va qayta ishlashga ixtisoslashgan ilmiy-tadqiqot laboratoriyasida ham bo’ldilar.

Michurinsk davlat qishloq xo’jaligi universitetida qo’lga kiritilgan ilmiy yutuqlarni hamda tajribadan o’tkazilgan innovatsion metodlarni Farg’ona viloyati qishloq xo’jaligi sohasiga tatbiq etish bo’yicha ish tashkil etishga kelishib olindi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram