1. Bosh sahifa

FARG’ONA VA XITOY IQTISODIY HAMKORLIGI YANGI BOSQICHGA KO’TARILADI: VILOYAT HOKIMI XAYRULLO BOZOROV XITOYDA QATOR YIRIK KOMPANIYALAR RAHBARLARI BILAN SAMARALI MUZOKARALAR O’TKAZDI

×

Viloyat hokimi Xayrullo Bozorov boshchiligidagi Farg’ona viloyati rasmiylari hamda tadbirkorlaridan iborat delegatsiyasining Xitoyga tashrifi doirasida Pekin, Shanxay shaharlarida, Shandun, Chjetszyan, Tszyansu, Shansi, Shensi provintsiyalarida qator yirik kompaniyalar rahbarlari bilan samarali muzokaralar o’tkazildi, ishlab chiqarish korxonalari faoliyati bilan tanishildi.

Xitoy milliy qurilish materiallari kompaniyalari guruhi (SNBM) tarkibiga kiruvchi “China Triumph International Engineering” kompaniyasi rahbari Ma Liyun bilan uchrashuvda viloyatimizda qiymati 15 mln. dollar va kunlik quvvati 800 t. bo’lgan toblangan oynalar ishlab chiqarish loyihasini amalga oshirish yuzasidan dastlabki kelishuvga erishildi.

“Shandong Swan Cotton Industrial Machinery Stock” kompaniyasi raisi Vang Shinting bilan o’tkazilgan uchrashuvda avval kelishilgan Farg’ona shahrida mahalliy hamkor “Hamkor Group” MChJ ishtirokida qiymati 11 mln. dollar bo’lgan qishloq xo’jaligi texnikalari, xususan, 100 ta terim mashinalarini yig’ish loyihasini joriy yil iyun oyida amalga oshirishni boshlashga kelishildi. Loyihaning ikkinchi bosqichida bug’doy o’rish va mavsumiy sabzavotlar yig’ish mashinalari ishlab chiqarish, qishloq xo’jaligi texnikalariga xizmat ko’rsatish va mutaxassislarni tayyorlash markazini ishga tushirishga kelishib olindi.

Xitoyda issiqxonalar yo’nalishiga ixtisoslashgan Shouguan shahrida “Qinzhou Bomo” korxonasi rahbariyati bilan uchrashuv o’tkazilib, unda Oltiariq tumanida qiymati 10 mln. dollarlik issiqxonalar uchun qoplamalar va yengil tipdagi konstruktsiyalar ishlab chiqarish loyihasini amalga oshirish bo’yicha dastlabki kelishuvga erishildi. Mazkur loyiha doirasida kompaniya vakillarining joriy yil avgust oyida Farg’onaga tashrifi tashkil etiladi.

“Electrical System” kompaniyasi boshqaruv kengashi Karl Yan bilan muzokaralar davomida Farg’ona viloyatida qiymati 15 mln. dollar bo’lgan transformatorlar, elektromobillar uchun quvvatlash uskunalari va energiya saqlash stantsiyalarini ishlab chiqarish loyihasi yuzasidan muzokaralar o’tkazildi. Kompaniya vakillari 20 iyun kuni Farg’onaga tashrif buyuradi, loyihalar bo’yicha o’rganishlarni boshlaydi.

Tibbiyot texnologiyalari ishlab chiqarishda Xitoyning yetakchi kompaniyasi hisoblangan Microport kompaniyasida aqlli texnologiyalarga asoslangan jarrohlik jihozlari, amaliyot jarayonlarini robotlashgan holatda hamda masofadan amalga oshirish bo’yicha bugungi kunda dunyoda tatbiq etilayotgan eng so’nggi yondashuvlar bilan tanishildi, kompaniya ta'sischisi Aleks Xe bilan viloyatimiz tibbiyot muassasalariga bunday texnologiyalarni tatbiq etish imkoniyatlari muhokama qilindi. Yaqin muddatda Farg’ona viloyati tibbiyot sohasi mutasaddilaridan iborat delegatsiyani kompaniyaga safarini tashkillash hamda hamkorlik bo’yicha kelgusi choralarni aniq belgilashga kelishib olindi.

Skyworth brendi ostida maishiy texnikalar hamda Wi-Fi jihozlari ishlab chiqaruvchi Shaanxi Qin Shen Electronic Technology kompaniyasida ishlab chiqarilayotgan mahsulotlar ko’zdan kechirildi, kompaniya rahbari Tsao Chjuntsin bilan viloyatimiz hududida maishiy texnikalar ishlab chiqarish loyihasini amalga oshirish bo’yicha dastlabki kelishuvga erishildi, yaqin oylarda Tsao Chjuntsin O’zbekiston bozorida mavjud imkoniyatlarni bevosita o’rganish uchun Farg’onaga tashrif buyurishiga kelishildi.

“Sichuan Shengyakai Fastening Equipment Co., Ltd.” kompaniyasi tomonidan Farg’ona shahri “Baqay” kichik sanoat zonasida qiymati 10 mln. dollar bo’lgan qurilish-montaj pistoletlari ishlab chiqarish loyihasini amalga oshirishga kelishildi.

“Shiyan Zhenke Industrial Technology Co., Ltd.” kompaniyasi vakillari bilan bo’lib o’tgan uchrashuvda Farg’ona viloyatida qiymati 20 mln. dollar bo’lgan tog’-kon sanoati texnikasini yig’ish loyihasi muhokama qilindi. Joriy yil avgust oyida kompaniya ekspertlaridan iborat guruhning viloyatimizga tashrifi belgilandi.

Bank-moliya yo’nalishida faoliyat yurituvchi “Rendi” kompaniyasi ta'sischisi Ren Yuysyan bilan muzokaralarda viloyatimiz hududida avtomobilsozlik, farmatsevtika, qurilish sohalarida investitsion loyihalarni amalga oshirishga kelishildi. Iyul oyida loyihalarni amalga oshirish maqsadida Farg’onada “Rendi” kompaniyasi ofisini tashkil etish hamda Pekin shahrida Farg’ona viloyati investitsiya va savdo markazini ochishga kelishildi.

Shuningdek, “Shandong Wiskind Architectural Steel Co., Ltd.” rahbariyati bilan “Qo’qon” EIZ hududida metall prokatlar va sanoat ob'ektlari uchun sendvich panellar ishlab chiqarish, “Sinopharm Medicinal Materials” rahbariyati bilan uchrashuvda Farg’onada qiymati 20 mln. dollarlik farmatsevtika va tibbiyot anjomlari ishlab chiqarish farma-parki tashkil etish, “Meichuchuye” korxonasi boshqaruvi bilan bo’lgan uchrashuvda viloyat hududida umumiy ovqatlanish shaxobchalari uchun ikki bosqichda qiymati 10 mln. dollar bo’lgan oshxona inventarlari ishlab chiqarish, “Shandong Hualiang” kompaniyasi bilan uchrashuvda Farg’ona shahrida qiymati 15 mln. dollarlik va yillik ishlab chiqarish quvvati 1000 dona bo’lgan yuklagich texnikalari ishlab chiqarish loyihalari muhokama qilindi va dastlabki kelishuvlarga erishildi.

Ko’prik va yo’llar qurishda Xitoyning eng yirik kompaniyalaridan biri bo’lgan Shaanxi Road & Bridge Group ta'sischisi Shi Chan bilan o’tkazilgan muzokaralarda viloyatimiz hududida davlat-xususiy sheriklik shartlarida pullik avtomobil yo’llari barpo etish, shuningdek, Farg’onadan Toshkentga Tojikiston orqali xalqaro pullik avtomobil yo’li qurish loyihalari muhokama qilindi, bu borada birgalikda ish tashkil etishga kelishib olindi.

Viloyat hokimi boshchiligidagi delegatsiya a'zolari Shanxay shahridagi “17-xalqaro fotovoltayg va aqlli energiya – 2024” forum-ko’rgazmasida ham ishtirok etib, qator kompaniyalar vakillari bilan muzokaralar o’tkazdilar.

Farg’ona viloyati delegatsiyasi Xitoyga samarali tashrifini yakunlab Farg’onaga qaytib keldi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram