1. Bosh sahifa

FARG’ONADA TURKIYALIK ISHBILARMONLAR BILAN HAMKORLIKDA KASBIY VA PROFESSIONAL TA'LIM HAMDA TIBBIYOT SOHALARIDA YANGI LOYIHALAR AMALGA OSHIRILADI

×

Viloyat hokimi Xayrullo Bozorov Turkiyaning Oghma international eğitim, Türkiye Dental ve Tahwil Health Tour kompaniyalari rahbarlaridan iborat ishbilarmonlar delegatsiyasini qabul qildi.

Viloyat hokimi boshchiligidagi Farg’ona viloyati delegatsiyasining joriy yil iyun oyining boshida Turkiyaga amaliy tashrifi davomida erishilgan kelishuvlarning davomi bo’lgan bugungi uchrashuvda kasbiy va professional ta'lim hamda tibbiyot sohalarida amalga oshirish rejalashtirilayotgan loyihalar muhokama qilindi.

Oghma international eğitim kompaniyasi rahbari Emre Erbay tomonidan viloyatimizdagi kasb-hunar maktablarini har birini viloyatdagi talablardan kelib chiqqan holda ma'lum sohaga ixtisoslashtirish, zamonaviy amaliyot laboratoriyalari bilan to’la jihozlash hamda xorijiy tilni chuqurlashtirgan holda xalqaro kasbiy ta'lim dasturlari asosida ta'lim jarayonini tashkillash, bunda Turkiyadan yuqori malakali kasbiy ta'lim o’qituvchilarini ham jalb etish, bitiruvchilarni viloyatimizdagi yirik ishlab chiqarish korxonalariga ishga yo’naltirish bilan birga xorijda yuqori sharoitlarda bandligini ta'minlash loyihasi taqdim etildi.

Türkiye Dental kompaniyasi vakili Murat Sezgun kompaniya tomonidan rejalashtirilayotgan, Farg’onada zamonaviy xalqaro stomatologiya klinikasi barpo etish, shuningdek, tish implantlari ishlab chiqarishni yo’lga qo’yish hamda Farg’ona vodiysidagi stomatologiya muassasalari rahbarlari, menejerlari, stomatologlar va zubotexniklar uchun xorijlik mutaxassislarni jalb etgan holda zamonaviy malaka oshirish muassasasi tashkil etish loyihalari yuzasidan viloyat hokimiga ma'lumot berildi.

Turkiya tibbiyot turizmining rivojida muhim o’ringa ega Tahwil Health Tour kompaniyasi rahbari Kadir Yelbey, tibbiyot turizmining asosiy yo’nalishlari bo’lgan soch transplantatsiyasi, plastik jarrohlik, stomatologiya va boshqa yo’nalishlarda mutaxassislar tayyorlash hamda ularni xalqaro tan olingan sertifikatlar bilan ta'minlash borasida hamkorlik qilishga hamda viloyatga xorijlikni jalb etishda tibbiyot turizmi marketingi borasida o’z tajriba va bilimlari bilan o’rtoqlashishga tayyor ekanliklarini bildirdi.

Taqdim etilgan loyihalarni yuqori baholagan viloyat hokimi, ularni muvaffaqiyatli amalga oshirishda har tomonlama qo’llab-quvvatlashga tayyor ekanliklarini bildirdi.

Har bir loyiha bo’yicha hamkorlikda ish tashkil etishga kelishib olindi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram