1. Bosh sahifa

BO’ZATOVDA YANGI LOYIHALAR ISHGA TUSHIRILADI

×

Viloyatimizga biriktirilgan Qoraqalpog’istonning Bo’zatov tumanida "Farg’ona tajribasi" asosida ijtimoiy-iqtisodiy rivojlantirish bo’yicha tizimli ishlar davom ettirilmoqda.

2024-2025 yillarda qiymati 66,3 mlrd. so’mlik investitsiya loyihalari amalga oshirilib, 44 ta tadbirkorlik sub'ektlarini tashkil etish, mingdan ziyod yangi ish o’rinlarini yaratish belgilangan. Joriy yilning o’tgan davrida qishloq xo’jaligi, sanoat, xizmat ko’rsatish yo’nalishlarida 18 ta loyiha ishga tushirildi.

Viloyat hokimligi tomonidan ayni kunlarda Sayxunobod, Uychi, Zarbdor va G’ijduvon tajribalari asosida tumanda aholini band qilish, tadbirkorlikni rivojlantirish, kambag’allikni qisqartirish bo’yicha amaliy ishlar olib borilyapti.

Viloyat hokimining birinchi o’rinbosari Xabib Sirojitdinov rahbarligida viloyat mutasaddilaridan iborat guruh ayni damda Bo’zatovda bo’lib, hududni ijtimoiy-iqtisodiy rivojlantirish bo’yicha ishlarga ko’mak beryapti.

Xabib Sirojitdinov viloyat hokimligi tomonidan barpo etilgan 15 gektarlik uzumzorda bo’lib, ish jarayonlari bilan tanishdi. Ushbu uzumzor tag qismidan ham unumli foydalanish maqsadida tarvuz ekilgan.

Shu joyda viloyat hokimining birinchi o’rinbosari bu yerga mas'ul bo’lgan viloyatimiz vakillari bilan topshiriqlar ijrosi bo’yicha muloqot o’tkazdi.

"Farg’ona Bo’zatov Beshariq dehqonlari" MChJ dala maydonidagi 4 gektar maydonga ekilgan piyozlarni yig’ishtirib olish jarayoni ham ko’zdan kechirildi. Bu yerda bandligi ta'minlanayotgan mahalliy aholi vakillari bilan suhbatlashildi.

Tumanda amalga oshirilayotgan investitsiya loyihalarini o’z vaqtida ishga tushirish, har bir mahallani o’sish nuqtalarini aniqlab, oilalarni daromadli qilish, tadbirkorlikni rivojlantirish borasida mas'ullarga tegishli topshiriqlar berildi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram