1. Bosh sahifa

FARG’ONA SHAHRIDAGI EKOSHAHAR AMFITEATRIDA “OXUNJON MADALIYEV QO’SHIQLARI EL QALBIDA YASHAYDI" XALQARO FESTIVAL - TANLOVINING G’OLIB VA SOVRINDORLARINI TAQDIRLASH MAROSIMI BO’LIB O’TDI

×

Festivalda so’zga chiqqan viloyat hokimining o’rinbosari Sherzodjon Polvonov ilk bor o’tkazilgan xalqaro tanlov yangi nomlarni kashf etgani, qo’shni davlatlarda ham o’zbek san'atiga e'tibor yuqoriligi hamda xalqimizning sevimli hofizi qo’shiqlarda barhayot ekanligini ta'kidladi.

O’zbekistonda xizmat ko’rsatgan artist, "Shuhrat" medali sohibi Oxunjon Madaliyev betakror ovozi va o’lmas qo’shiqlari bilan xalqimizning qalbidan joy olgan san'atkor edi. Qisqa umr ko’rgan bo’lsada durdona qo’shiqlar yarata oldi. 1983 yilda "Ziyodam" deb nomlangan ilk qo’shiqlar albomini yaratgan. Keyinchalik "Seni asrasin", "Kimligini aytmayman", "Sendadir xayolim", "Yulduzim", “Navbahor", "Javohirim", "O’zbeklarim", “Yolg’iz ayol”, “Sog’inch", “Yoshligim", "Unutmoq osonmas bizlarni" kabi musiqiy albomlarni muxlislarga taqdim etgan. 300 dan oshiq qo’shiqlari hozirda ham xalqimiz tomonidan sevib tinglanmoqda. Ayniqsa, san'atkorlarimiz tomonidan Oxunjon Madaliyevning qo’shiqlari maromiga yetkazib ijro etilayotgani uning o’ziga xos maktabi yaratilganligini ko’rsatmoqda.

Viloyat hokimligi, Madaniyat vazirligi, Vodiy1.uz internet nashri tomonidan tashkil etilgan ko’rik-tanlov ko’tarinkilik bilan tashkil etildi. Qo’shni Tojikiston (Xo’jand) va Qirg’iziston (O’sh) da o’tgan bosqichlarida 70 nafar, Farg’ona shahrida o’tkazilgan bosqichida esa mamlakatimizdan 150 dan ziyod hofizlar ishtirok etdi.

Xalqaro tanlovning yakuniy natijalariga ko’ra, 1-o’rinni Nazrullo Shamsiyev (Navoiy viloyati) egalladi. 2-o’ringa Mo’minjon Ergashev (Farg’ona viloyati) va Rustam Tursumatov (Tojikiston Respublikasi) munosib ko’rildi. Anvar Xoldorov (Qirg’iz Respublikasi), Obidjon Doniyorov (Qashqadaryo viloyati) va Zafarjon Hoshimov (Toshkent viloyati) 3-o’rinni qo’lga kiritishdi. Shuningdek, turli nominatsiyalar bo’yicha g’oliblar aniqlandi.

G’oliblarga tashkilotchilarning diplom, tashakkurnomalari, esdalik sovg’alari va pul mukofotlari topshirildi.

Oxunjon Madaliyev qo’shiqlari ijrochilari tomonidan tayyorlangan kontsert dasturi hamda O’zbekistonda xizmat ko’rsatgan artist Abdurashid Yo’ldoshev, estrada yulduzlari Otabek Muhammadzohid, Abdujalil Qo’qonov, Qilichbek Madaliyevlarning chiqishlari barchaga zavqu shavq ulashdi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram