1. Bosh sahifa

FARG’ONADA HUDUDIY TARMOQLARARO SANOAT YARMARKASI ISH BOSHLADI

×

Bugun Farg’ona viloyati hududiy tarmoqlararo sanoat yarmarkasi o’z ishini boshladi. Farg’ona shahridagi Olimpiya va paralimpiya sport turlariga tayyorlash markazida tashkil etilgan yarmarkaning ochilish marosimida viloyat hokimi Xayrullo Bozorov, Qirg’izistonning Batken viloyati gubernatorining birinchi o’rinbosari Marufxan Tulayev ishtirok etdilar.

Sanoat yarmarkasi ochilishida so’z olgan viloyat hokimi, muhtaram Prezidentimiz boshchiliklarida so’nggi yillarda mamlakatimizda amalga oshirilayotgan muvaffaqiyatli iqtisodiy islohotlar natijasida bozor tamoyillarini iqtisodiyotga joriy qilish, davlatning iqtisodiyotdagi rolini kamaytirish va xususiy sektorning ishtirokini kengaytirish bo’yicha katta natijalar qayd etilayotganiga e'tibor qaratdi.

Bu jarayonda tadbirkorlikni qo’llab-quvvatlash, sanoatimizni ham tarmoqlararo rivojlantirish, har bir tarmoqqa alohida qaror va imtiyoz, mablag’lar ajratish, qolaversa, sanoat kooperatsiyasini rivojlantirish, import o’rnini bosuvchi mahsulotlarni o’zimizda ishlab chiqarishni yo’lga qo’yish, iqtisodiyot rivojining asosiy omili bo’layotgani qayd etildi.

Bugungi yarmarkadan ko’zlangan asosiy maqsad qo’shni Qirg’izistondagi imkoniyatlardan foydalangan holda Batken va Farg’ona viloyatlari tadbirkorlari uchun manfaatli hamkorlikni yo’lga qo’yish, korxonalarning ishlab chiqarish salohiyatini yanada oshirish, import o’rnini bosuvchi mahsulotlar ishlab chiqarishni rag’batlantirish, mahalliylashtirishni kengaytirish, shuningdek, mahalliy korxonalar o’rtasida sanoat kooperatsiyasi aloqalarini yanada kengaytirishdan iborat ekanligi ta'kidlandi.

“Kichik biznesning kooperatsion hamkorligi, iqtisodiyotning gurkirab rivojlanishiga asos bo’ladi, viloyatimiz bo’ylab tarmoqlararo kooperatsiyani to’g’ri yo’lga qo’ya olsak, ko’plab sanoat mahsulotlarini ishlab chiqarish imkoniyati paydo bo’ladi” – deya ta'kidladi viloyat hokimi.

Sanoat yarmarkasida ham o’zaro manfaatli va foydali kelishuvlar bo’lishiga, yangi loyihalar, g’oyalar tug’ilishiga tilak bildirildi.

Shundan so’ng respublikamizning barcha hududlari, Qirg’izistonning Batken viloyati rasmiylari va tadbirkorlaridan iborat delegatsiya sanoat yarmarkasiga taklif qilindi.

Mehmonlar yarmarkada viloyatlardan tashrif buyurgan 200 dan ziyod to’qimachilik va ipakni qayta ishlash, charm-poyabzal, mebelsozlik, neft va gaz sanoati mahsulotlarini ishlab chiqarish, shuningdek, qurilish materiallari, kimyo sanoati, elektrotexnika, avtomobilsozlik korxonalari mahsulotlari va viloyatimizda ishlab chiqarilayotgan boshqa sanoat mahsulotlari namunalari, o’zlashtirilishi rejalashtirilayotgan mahsulotlar, sanoat kooperatsiyasi orqali mahalliylashtirishga taklif qilinayotgan mahsulotlar hamda istiqbolli loyihalari bilan yaqindan tanishdilar.

Farg’ona viloyati Hududiy tarmoqlararo sanoat yarmarkasi ertaga, 17 iyun kuni ham davom etadi.

Bizni ijtimoiy tarmoqlarda kuzating
Facebook, Telegram, Facebook, YouTube, Instagram